我和花貓一起做了打開肚子手術取出異物

先講花貓 Micah 手術

一向為食的饞咀貓 Micah，上星期偷食我一塊三文魚，又舔我飲淨嘅 coco pops 朱古力奶，晚晚偷上廚房台揾野食，曳到無倫。
打過鬧過教過，我地要好小心食物要收好，佢就係成日肚餓，偷食完又會嘔。

上星期同佢玩 fetch & catch 遊戲時發現舊軟膠玩具越玩越細粒，細心留意發現原來佢每次擔番個玩具俾我時都會咬走一啲落肚，於是我收埋左。

第二日佢嘔到周地都係，然後下午我睇住佢嘔番舊玩具出黎，原來唔知幾時條友仔食鬼左！
我發現嘔番出黎果舊玩具又細左。

之後幾日 Micah 繼續嘔。
然後有一朝佢無晨早跳上床叫我餵，而且成朝躲在衣櫃裡，個樣好慘咁，我就知出事了!
為食貓竟然不肯進食！

帶佢去動物醫院睇急症，
經過一輪檢查照 X 光，發現肚裡有兩粒異物，即晚做手術開肚取出。
而家花貓出院，肚腩一條大疤痕，佢明顯受麻醉劑影響好 stone, 個樣慘慘豬咁。

異物竟然係兩粒石仔！我真係唔知佢响邊度揾到的！佢係 21 樓養嘅貓貓啊！

呢隻曳貓就咁又洗左我地二千澳元！求下你乖乖地啦！

接完貓出院, 第二日就到我入院喇, 兩家醫院相隔一條街。


我個內窺鏡手術

自從 20 歲時在英國意外地發現子宮頸有異常細胞並做手術切除後，我每年都會做婦科檢查。
呢兩年工作繁忙累得有時經期會超唔正常，而且 m 痛得強勁，痛不欲生要唱首何韻詩「神經痛」。


好多女仔認為 m 痛好平常，食下止痛藥就無事。
但我知道 m 係代表你身體狀況，我仲會下巴生痘痘，又係內分泌問題時間了。

我有睇中醫調理下，日日食苦藥好嘔心, 不過月經質量有改善左少少。
中醫叫我最好再去西醫睇下, 雙管齊下。

於是我又去婦科醫院求醫，照超聲波驗血咁呢樣果樣，幾個醫生都話我子宮係後屈的。（唔知係咪咁所以我狗仔式會痛呢？）
醫生話我嘅徵狀似是有子宮內膜異位 (Endometriosis), 建議我排期做腹腔鏡手術睇下肚內情況。
剛好就在我辭職後呢段 relax 既時間做手術，timing 啱啱好，手術後可無憂無慮地休息幾日唔洗番工。

手術後護士略略透露過程真的發現 Endometrosis 並切除左, 佢唔肯講係唔係朱古力瘤 (chocolate cyst), 
佢叫我乖乖等星期五覆疹, 醫生會好好解釋手術報告。
反正我當時受麻醉藥和止痛藥影響下迷迷糊糊, 就好似花貓 Micah 咁, 
護士講乜我都左耳入右耳出, 聽到手術成功後我就訓著左了。

總之呢, 各位如果 m 痛太強烈就最好 check 下。
請算唔 m 痛都好, 請每兩年去檢下柏氏沫片檢查, 無錯呢個並唔係好爽的測驗, 但忍幾分鐘就好架喇。