琴日睇左編文章講好多成功人士都有加入 [5am club] 的習慣，介紹佢地如何在 5-6am 時段已經做好運動，打坐同 affirmation，計劃一天要完成的任務表，並在 9am 前冇人打擾佢地之前就已經完成左最重要的一項。
好想試下。
前老細係個 80 歲老翁，佢每朝游完水 9am 前已經番左公司做野。
就算出 trip 都一定要揀有泳池的酒店，幾早都游水食早餐再可能坐一兩個鐘去工廠睇貨，或者睇新的供應商。
佢身體健康頭腦清晰從來唔生病，好乸勁。
我得唔得呢?
但係我真係好鐘意訓覺喎，唔生仔就係因為鐘意訓覺，接受唔到晨早就有 d 細路嘈生哂.
你而家要我就算 day off 都要 6:11am 起身?
我喎? 我好撚懶個喎?
不要懷疑! 快 d 去做!
而家要訓練既唔係意志力，而係一個新習慣!
做左先講!
今朝迫自己 6:11am 鬧鐘響, 15-20 分鐘 meditation & affirmation.
6:29 am 第 2 個鬧鐘再響, 俾自己 1 分鐘摸下貓貓。
6:30am 彈起身衝落樓做 gym。
7:00am gym 完沖澡, 沖咖啡, 食少少早餐。
8:00am 寫低 this week planning and today's to do list.
8:30am 呢個時候已經在電腦前完成左第一樣工作，之後襯新鮮就寫呢個 blog。
一陣會去中午 pilate, 然後染頭，再煮晚餐，要繼續做生意野。
幾好，幾鐘意呢個計劃.
而家 10am, 平日根本仲訓緊。
記得自己讀中學時有幾年時間自己較鬧鐘 4am 起身做功課 / 溫書 / 背測驗考試課本 / 有時畫下畫咁，到大約 6am 爸爸起身刷牙沖涼前我再上床訓番廿分鐘回籠覺，6:20am 爸爸用完浴室會叫我起身，到我沖涼換衫食早餐番學。
記得自己用呢段寧靜的 4am - 5:45am 天未光時段來溫書，自覺效果好過放學後晚飯後臨訓前先溫書，因為夜晚呢段時間又想打機，又想同阿妹玩，又想睇電視，番左一日學, 放學後又花兩三個鐘睇左卡通片做功課, 到晚飯後根本唔想再溫書。
到大學時生活好唔定時，又要番學, 又要番 2-3 份 part time, 又要去蒲, 又要去玩去旅行, 又要夾 band, 又要拍拖行街睇戲食飯... 都唔記得自己有冇訓過。不過十八歲精力旺盛通頂冇問題。
之後就到十年朝九晚七的打工仔生活，每朝 7am 起身，放工要蒲又要夾 band 又要拍拖又要去玩咁, 唔知幾點訓啦。
然後就到而家的爽爆每晚訓 10 至 12 個鐘快樂人生。
好多時係 10pm to 10am 都在床上訓，起得身 check 下各式各樣 social media 再沖涼刷牙洗面整得咖啡來都差不多到中午。
做一陣 business 野又要去 yoga, 之後可能要番工。
其實一日好似唔多夠時間咁。
點解細個反而唔洗訓咁多，而家又要最少 8 個鐘呢?
我決定要改變生活習慣。
而家要番工之餘仲要搞生意，老公又再次失業，如果我 6:11am 起身就等如多左一日咁，可以又番工又搞生意又做家務又做 gym 又去埋 yoga!
好! 一個月後再報告下成果!
https://steemit.com/life/@lowina/waking-up-at-6-11am-challenge-10-12-day-1
